Urukiko rw’Ibanze rwa Kicukiro rwemeje ko Uworizagwira Florient, uzwi ku izina rya Yampano, afungwa by’agateganyo iminsi 30 muri gereza ya Mageragere mu gihe iperereza n’ikurikiranacyaha bikomeje.
Iki cyemezo cyatangajwe kuri uyu wa 9 Kamena 2026 nyuma y’iburanisha ryari rigamije gusuzuma niba hari impamvu zikomeye zatuma akurikiranwa afunzwe by’agateganyo.
Mu mwanzuro warwo, urukiko rwasanze hari ibimenyetso bifatika byerekana ko Yampano ashobora kuba yarakoze ibyaha birimo gukubita no gukomeretsa ku bushake, gukoresha urumogi ndetse no kwangiza ikintu cy’undi.
Ku cyaha cyo gukomeretsa ku bushake, urukiko rwashingiye ku buhamya bw’uregwa ko yakorewe ihohoterwa, raporo z’inzego z’ibanze ndetse n’inyandiko za muganga zigaragaza ko yavuwe ibikomere. Ibi byafashwe nk’ibimenyetso bihagije byo gukomeza kumukurikirana kuri icyo cyaha.
Naho ku cyaha cyo gukoresha urumogi, urukiko rwagaragaje ko hari ibisubizo by’ibizamini byerekana ibipimo by’urumogi mu mubiri we, ndetse ko na we ubwe yemeye ko yarukoresheje. Ku cyaha cyo kwangiza ikintu cy’undi na cyo, urukiko rwasanze hari impamvu zikomeye zituma gikomeza gukorwaho iperereza.
Gusa ku bindi byaha Ubushinjacyaha bwari bwamurezeho, urukiko rwasanze ibimenyetso bitari bihagije. Muri byo harimo ubufatanyacyaha mu bwicanyi, guhoza ku nkeke uwo bashyigiranye ndetse n’ifungirana ry’umuntu binyuranyije n’amategeko.
Ku birebana n’ubufatanyacyaha mu bwicanyi, urukiko rwavuze ko nta bimenyetso bigaragaza umugambi cyangwa uruhare rwa Yampano rwamuhuza n’icyo
Nyuma yo gusuzuma impande zombi, urukiko rwafashe umwanzuro wo gutegeka ifungwa ry’agateganyo ry’iminsi 30 muri gereza ya Mageragere. Nk’uko amategeko abiteganya, Yampano afite uburenganzira bwo kujuririra iki cyemezo mu gihe cy’iminsi 30 uhereye igihe cyatangarijwe.
Kugeza ubu, akomeje gukurikiranwaho ibyaha bitatu birimo gukubita no gukomeretsa ku bushake, gukoresha urumogi no kwangiza ikintu cy’undi, mu gihe ibyaha bitatu byari byongewe ku dosiye ye bitabonetsemo ibimenyetso bihagije byo kubikomeza.
Leave a Reply